Dövriyyə həddini keçən şirkət ƏDV qeydiyyatı üçün vaxtında müraciət etməsə, qeydiyyatdan əvvəlki əməliyyatlara görə də vergi və maliyyə sanksiyası hesablana bilər.
Vergi Məcəlləsinə görə, ardıcıl on iki ayın istənilən ayında vergi tutulan əməliyyatların həcmi 200 000 manatı keçən şəxs ƏDV məqsədləri üçün qeydiyyata alınmalıdır. Hədd keçildiyi aydan sonrakı ayın 20-dək vergi orqanına ərizə verilməlidir.
Həddi necə hesablamalı
Təcrübədə ən çox səhv dövriyyənin hesablanmasında olur. Şirkətlər çox vaxt yalnız mal satışını sayır, xidmət haqlarını, əsas vəsaitlərin satışını və ya barter əməliyyatlarını unudur. Hesablamanı ay-ay aparmaq və cədvəli mühasibatla mütəmadi tutuşdurmaq lazımdır.
Gecikmənin nəticələri
Qeydiyyat vaxtında edilmədikdə vergi orqanı həddin keçildiyi andan etibarən bütün əməliyyatlara ƏDV hesablayır. Bu zaman şirkət alıcıya elektron qaimə-faktura verə bilmədiyi üçün vergini qiymətə əlavə edə bilmir və məbləği öz vəsaitindən ödəyir. Üstəlik maliyyə sanksiyası və faizlər hesablanır.
Nə etməli
Dövriyyəsi 150 000 manata yaxınlaşan şirkətə qabaqcadan hazırlaşmağı tövsiyə edirik: müqavilələrdə qiymətin ƏDV daxil olub-olmadığını aydın yazmaq, uçot proqramını tənzimləmək və əsas müştərilərlə şərtləri razılaşdırmaq. Könüllü qeydiyyat da mümkündür və bəzən, xüsusən iri korporativ müştərilərlə işləyəndə, daha sərfəlidir.
Vəziyyətinizi qiymətləndirmək üçün son 12 ayın satış reyestri ilə bizə müraciət edin.
